შესავალი
ციფრული ტექნოლოგიების ერაში ტელევიზორის ფუნქციები და შესაძლებლობები ბევრად მეტია, ვიდრე საწყის ეტაპზე, როდესაც ტელევიზორში მხოლოდ სატელევიზიო გადაცემების ყურება შეგვეძლო. ტელევიზორის ფართო გაყიდვაში შემოტანის შემდეგ თუ მისი ქონა პრივილეგიად ითვლებოდა, ახლა იშვიათია ოჯახი, სადაც ტელევიზორს ვერ ნახავთ. აქედან გამომდინარე, სახლისთვის შესაბამისი ტელევიზორის შერჩევა უზრუნველყოფს თქვენი საცხოვრებელი სივრცის თქვენსავე ინტერესებზე მორგებას. დღესდღეობით ბაზარზე გვხვდება ისეთი ტელევიზორები, რომლებსაც ჩვენთვის საინტერესო ფუნქციები გააჩნია დაწყებული 4K რეზოლუციით, smart ფუნქციებით და ხმის სისტემით დამთავრებული. თქვენ შეგიძლიათ სწორედ ისეთი ტელევიზორის შეძენა, რომლის ფუნქციებიც სრულად ერგება თქვენს ინტერესებს, მაგალითად, თუ გიყვართ ფილმების ყურება, ვიდეო თამაშები ან უბრალოდ სახლის გასართობი კუთხის მოწყობა გსურთ, გაითვალისწინეთ რამოდენიმე დეტალი ტელევიზორის შეძენისას.
ეკრანის ზომა
მაშინ, როდესაც ამხელა არჩევანი გვაქვს ტელევიზორის შეძენისას, ერთ-ერთი პირველი მახასიათებელი, რასაც ყურადღება უნდა მივაქციოთ არის ეკრანის ზომა. პირველ რიგში, უნდა გავითვალისწინოთ მაქსიმუმ რამდენმა ადამიანმა შეიძლაბა უყუროს ტელევიზორს (ოჯახის წევრების რაოდენობა) და სად აპირებთ ახალი ტელევიზორის დამონტაჟებას – რამდენად შეესაბამება ტელევიზორის ზომა იმ სივრცეს, სადაც აპირებთ მის დამონტაჟებას. ხშირად ტელევიზორის სიდიდე ასოცირდება მის ხარისხთან, რამაც ახალი ტელევიზორის ყიდვისას შესაძლოა შეცდომაში შეგიყვანოთ.
ტელევიზორის ეკრანის ზომა მისი დიაგონალის ზომით გამოითვლება და ძირითადად, ინჩებით (“) აღინიშნება (1ინჩი=2.54სმ).
ტელევიზორთან ჯდომისას თუ ხედავთ მის თითოეულ პიქსელს ე.ი ძალიან ახლოს ზიხართ ეკრანთან. იმისათვის, რომ ოპტიმალური საყურებელი მანძილი გამოვითვალოთ შეგვიძლია გამოვიყენოთ შემდეგი რეკომენდაცია: ტელევიზორის ეკრანის სიმაღლე გადაამრავლეთ სამზე HD ეკრანის შემთხვევაში და 1.5-ზე 4K Ultra HD-ს შემთხვევაში და თქვენ მიიღებთ იმ რიცხვს, რაც ოპტიმალურია ამ კონკრეტული ტელევიზორის საყურებლად. სხვა სიტყვებით რომ ვთქვათ 4K UHD ტელევიზორთან ორჯერ უფრო ახლოს შეგიძლიათ ჯდომა.
ეკრანის რეზოლუცია
რას ნიშნავს რეზოლუცია და რატომ არის ის მნიშვნელოვანი ტელევიზორის შეძენისას? რეზოლუცია არის ეკრანის სიგრძეზე და სიგანეზე პიქსელების რაოდენობა. რაც მეტია პიქსელის რაოდენობა, მით მკვეთრია გამოსახულება და უკეთესია დეტალების გარჩევადობა.
მრავალი წლის განმავლობაში 1280×720 (HD 720p) და 1920×1080 (1080p) რეზოლუცია, რომელსაც HD (High Definition) მაღალი გარჩევადობის ეკრანს უწოდებენ, იყო სტანდარტი. თუმცა ტელევიზორების მწარმოებლებმა ხარისხის გაუმჯობესების მიზნით, შემოგვთავაზეს Ultra HD იგივე 4K რეზოლუცია, რომელსაც ოთხჯერ მეტი რაოდენობის პიქსელი აქვს HD-თან შედარებით. ჩვენ ვსაუბრობთ ჰორიზონტალურ 2 160 და ვერტიკალურ 3 840 პიქსელზე (3840×2160). ხოლო 8K რეზოლუციის შემთხვევაში, ტელევიზორს აქვს 7680×4320 რეზოლუცია.
აღსანიშნავია, რომ საქართველოში ჯერ-ჯერობით არ არის გავრცელებული 4K და 8K ციფრული მაუწყებლობა, ამიტომ თუ არც გეიმერი ხართ და არც ფილმების ყურებით ხართ ზედმეტად გატაცებული, შეგიძლიათ HD რეზოლუციის მქონე ტელევიზორი შეიძინოთ, რითაც ფინანსებსაც დაზოგავთ და თქვენზე მორგებულ სხვა მრავალ ფუნქციას მიიღებთ.
HDR: მეტი ფერი თქვენს ტელევიზორში
HDR (High Dynamic Range) მხარდაჭერის მქონე ტელევიზორს აქვს უფრო მეტი ფერი, მაღალი კონტრასტული დონე და გაზრდილი სიკაშკაშე. ამ შემთხვევაში გადამამუშავებელი პროცესორი სტანდარტულ გამოსახულებას გარდაქმნის მაღალ დინამიკურ გამოსახულებად. არსებითად HDR არის 4K-ს ან Ultra HD ფორმატის განახლება (ის არ გამოიყენება 1080p HD უმეტესობა მოწყობილობებზე).
ძველი SDR (standard dynamic range)-გან განსხვავებით HDR უზრუნველყოფს მეტად ნიუანსირებულ და რეალურთან მიახლოებულ გამოსახულებას. დეტალების დანახვა უფრო მარტივია, ფერები მდიდარია და ფერების მსუბუქი გრადაცია და განათება მაყურებლისთვის უფრო ფაქიზად აღქმადია. ამ თითქოს მცირე ცვლილებამ დრამატულად შეიძლება შეცვალოს თქვენი ტელევიზორის გამოსახულების ხარისხი.
განახლებს სიხშირე
განახლების სიხშირე გამოიხატება ჰერცებში (Hz) და ასახავს იმას, თუ რა სიხშირით იცვლება კადრი წამში. სტანდარტულად, ეკრანზე წამში 60 კადრი იცვლება, ხოლო მაქსიმუმი სიხშირე შესაძლოა 120-დან 240 ჰერცამდე ვარირებდეს. რაც უფრო სწრაფად მოძრავი ობიექტია გამოსახული ეკრანზე, მით უფრო მაღალი სიხშირეა საჭირო, რადგან 60 ჰერცის პირობებში კადრი შესაძლოა არ იყოს მკვეთრი და დაიბუროს. ასე რომ მწარმოებლებმა გააორმაგეს განახლების სიხშირე და 120 Hz-მდე და ზოგ შემთხვევაში, 240 Hz-მდეც გაზარდეს.
რეკომენდებულია, ტელევიზორის ყიდვის დროს გაითვალისწინოთ, რომ მისი განახლების სიხშირე 120 ჰერცზე ნაკლები არ იყოს.
ტელევიზორის ტიპები
დღესდღეობით, ყველაზე დიდი მოთხოვნა LED LCD ტელევიზორებზეა. HD დაUltra HD სისტემის მქონე ტელევიზორები იყენებენ Light-emitting diodes (LEDs) ეს არის დიოდური ნათება, რომელიც LCD (Liquid Cristal Display) ანუ თხევად-კრისტალური ეკრანის გასანათებლად გამოიყენება, შედეგად ვიღებთ ღრმა ფერებს. აღნიშნული სახეობის ტელევიზორი შესაძლოა იყოს ძალიან თხელი. ამ ტიპის ტელევიზორს აქვს ეკრანის დინამიური განათების ფუნქცია, რაც გულისხმობს ეკრანის ზოგიერთი მონაკვეთის უფრო მეტად განათებას და დანარჩენი ნაწილების ჩაბნელებას, რათა უკეთ მოხდეს ეკრანზე განათებული და ჩაბნელებული უბნების შეთავსება – ამ ფუნქციას ეწოდება აქტიური ჩაბნელება ან ლოკალური ჩაბნელება.
მეორე LCD ტექნოლოგია, რომელსაც QLED (quantum dots LED) სისტემის მქონე ტელევიზორს გააჩნია, თითქმის იგივეა, რაც LED სისტემა, იმ განსხვავებით, რომ დამატებულია კიდევ ერთი „ფენა“ ნანოკრისტალებისა, რომლებიც გამოსახულებას მრავალფეროვან ფერთა გამას და მეტ სიკაშკაშეს სძენს.
OLED (Organic Light Emitting Diod) ტელევიზორები LED-LCD ტელევიზორებს რამოდენიმე ათეული განათების ფენით უსწრებენ. OLED ტიპის ტელევიზორი განათებისთვის იყენებს ორგანულ შუქდიოდებს და აქვს ყველაზე გამორჩეული კონტრასტი პიქსელურ დონეზე, რაც ყველაზე კარგად მაშინ ჩანს, როდესაც ეკრანზე ფონად გამოტანილია შავი ფერი (მაგ.: შავ ფონზე ფეიერვერკები).
Smart ტელევიზორი
Smart ტელევიზორები უკვე ფართოდაა გავრცელებული, მაგრამ ახლა ისინი ბევრად „ჭკვიანები“ არიან, ვიდრე ჯერ კიდევ მათი გამოჩენისას შეგვეძლო წარმოგვედგინა.
თანამედროვე ბაზარზე არსებულ ტელევიზორთა უმრავლესობას უკვე აქვს Wi-Fi, რომლის საშუალებითაც ტელევიზორიდანვე შეძლებთ მულტიმედიურ სერვისებთან წვდომას, როგორიცაა Netflix, Youtube და ა.შ., შეძლებთ ფილმების ჩამოტვირთვას, თამაშების თამაშს და Facebook-ზე დაპოსტვასაც კი. ასევე შეძლებთ პირდაპირ ვებ ბრაუზერში შესვლას და ინტერნეტის პირდაპირ ტელევიზორიდან მოხმარებას.
თუ თქვენ გადაწყვიტეთ Smart ტელევიზორის შეძენა, თქვენ გექნებათ:
- App Store – წვდომა App Store-თან, საიდანაც შეძლებთ ნებისმიერი აპლიკაციის, თამაშის და სტრიმინგ აპლიკაციების ჩამოტვირთვასაც კი.
- ხმოვანი კონტროლი – ინტეგრირებული ხმოვანი ასისტენტი, როგორიც არის ამაზონის ალექსა და გუგლის ასისტენტი ან პროგრამული უზრუნველყოფა ხმის ამოცნობისთვის, რისი მეშვეობითაც აკონტროლებთ ტელევიზორს და ხმოვანი მოთხოვნების შედეგად, მის საძიებო სისტემასაც.
- მშობლების კონტროლი – თქვენ შეძლებთ აკონტროლოთ და აკრძალოთ წვდომა გარკვეული შინაარსის მქონე ვიდეოებთან და აპლიკაციებთან, რითიც უზრუნველყოფთ თქვენი შვილებისთვის უსაფრთხო კონტენტთან წვდომას.
თქვენ შეძლებთ: - ტელევიზორის მონიტორად გამოყენებას – ყველაფერს, რასაც ლეპტოპში ან სმარტფონზე უყურებთ შეძლებთ ტელევიზორში გადატანას და დიდი ეკრანით ნახვას.
- ტელევიზორის Smart სახლთან ინტეგრირებას – Smart სახლის ეკოსისტემასთან შეთავსებადობა საშუალებას გაძლევთ ტელევიზორი აკონტროლოთ ან ინტერაქცია მოახდინოთ სახლში არსებულ სხვა Smart მოწყობილობებთან, როგორიცაა განათება, თერმოსტატი ან დაცვის სისტემა.
- პერსონალიზებური რეკომენდაციებით სარგებლობას – ალგორითმი, რომელიც გთავაზობთ თქვენს პრიორიტეტებზე და უკვე მოძიებულ მონაცემებზე დაფუძნებულ კონტენტს.
- რამოდენიმე მომხმარებლის პროფილის შექმნას – რამოდენიმე პროფილის შექმნა საშუალებას გაძლევთ, თითოეულ მომხმარებელს საკუთარი ინტერესებიდან გამომდინარე ჰქონდეს რეკომენდაციები და უპირატესობები.
- ჩანაწერების გაკეთების საშუალებას – ჩაშენებული ვიდეო ჩამწერი (DVR) საშუალებას გაძლევთ ჩაიწეროთ პირდაპირ ეთერში გასული გადაცემები და უყუროთ მოგვიანებით.
აღნიშნული შესაძლებლობები გაძლევთ საშუალებას თქვენი ტელევიზორი იყოს თანამედროვე სახლის გასართობი სისტემის ნაწილი და გთავაზობთ შესაძლებლობების უფრო ფართო არეალს, რაც ბევრად ცდება ტრადიციული ტელევიზორის ცნებას.
თანამედროვე ტენდენციები და ფუნქციები ძალიან მიმზიდველად ჟღერს, თუმცა ტელევიზორის შეძენისას გადამწყვეტი მნიშნელობა აქვს იმას, თუ რა დანიშნულებით და სიხშირით იყენებთ მას, მაგალითად, თუ თქვენ გიტაცებთ გეიმინგი ან ფილმების მაღალ ხარისხში ყურება, სხვა მონაცემებს და ფასს უნდა ელოდეთ, ხოლო თუ თქვენთვის მისაღებია სტანდარტული ფუნქციები, რასაც გთავაზობთ კომპანიების უმრავლესობა, თანხასაც დაზოგავთ და საკმაოდ კარგ ხარისხსაც მიიღებთ. Region Technics გთავაზობთ ტელევიზორების ფართო არჩევანს და თქვენი მოთხოვნილებებიდან გამომდინარე დაგეხმარებით სასურველი ტელევიზორის შერჩევაში.